«Джинсыны төзәтеп тә була». Россия халкына ел саен яңа джинс чалбар алмаска киңәш иттеләр

Россия вице-премьеры Виктория Абрамченко Россия халкына сезон саен яңа джинс чалбар алмаска киңәш итте. Аның сүзләренчә, бу – илдә яшәүче һәр кешенең экологияне саклауга өлеше булырга мөмкин. Бу турыда РБК яза.

«Тагын джинсы: зинһар өчен, һәр сезон саен яңа джинсы алмагыз. Бер үк джинсы белән шактый озак йөреп була, аны төзәтеп тә була», – ди ул.

«Экология» илкүләм проектына кураторлык итүче Абрамченко «Россия 24» каналы эфирында чыгышында үз гаиләсендәге гадәтләр белән уртаклашкан. Мәсәлән, алар, бергәләп, чүп-чарны сортларга бүлә.

«Мин хәзер тышлыгы азрак булган урыннан сатып алырга тырышам, мин хәзер пластикны юам, мин хәзер пыяланы юам, чүп-чарны сортларга аралыйм», – ди ул.  Бу турыда «Татар-информ» яза.