«Дуслар төп башына утырта» — Азат Фазлыев халыктан рецепт сорый
Татар эстрадасы җырчысы Азат Фазлыев Инстаграм битендә язылучыларына: «Борыннары чөелгән дуслар белән нәрсә эшләргә?» - дигән сорау биргән.
«Әйтегез әле, сезнең дә бармы шундый танышларыгыз, «дусларыгыз»: синең ярдәм кирәк булганда яныңда елмаеп кына йөриләр… Ә аннары… Кеше булгач… Борыннары әллә кая чөелә!
Менә шундыйлар белән нәрсә эшләргә була? Әйтегез әле берәр рецепт. Баш каткан», — дип киңәш сораган Азат Фазлыев.
«Андыйлар сиңа нәрсәгә, Азат? Син дә оныт алар турында», «Беркатлы булмаска, бөтен кешегә дә ярдәм итмәскә, кешене кеше түгелләрдән аерырга өйрәнергә! Менә шул, минемчә, Азат! Менә бер хата җибәргәнсең. Кеше булгач дип… Борын күтәрү кешелек сыйфатларына хас әйбер түгел», «Андыйлар белән буа буарлык. Рецептын белмибез, кызганыч. Сез ул рецептны тапсагыз, безгә дә әйтегез, зинһар», «Бер кешегә дә ышанырга ярамый: дуслар төп башына утырталар шул. Бар кешене дә үзең белән тиңләргә ярамый. Ялганчылар, ялагайлар күп», — дип яза инстачылар.