13 апрельдә Чиләбе өлкәсенең Красноармейский районы Родник авылы дуңгыз комплексында фаҗига була. Ферманың эшчеләре тирес чыгара торган коллекторда ике эшченең мәетен таба, тагын берсе авыр хәлдә була.
«КП-Челябинск» ачыклаганча, эшчеләр берсен-берсе коткарырга теләп фаҗигагә тарганнар икән.
— Эшчеләргә канализация чистарту бурычы куелган булган, – дип сөйләгән фаҗигане тикшерүче полицейский. – Канализация торбаларындагы тыгылган тиресне каезлгааннар. Беренче тапкыр гына эшләүләре булмый. Күпмедер эшләгәч, эшчеләрнең берсе насосны ялгарга дип китә һәм үзе килмичә эшләми торырга куша. Әмма эшчеләрнең тагын берсе моны тыңламый, противогазсыз гына канализация чокырына төшә.
Насос кудыра башлагач, торбалар эченә җыелган газлар бәреп чыга. Аска төшкән эшче агуланудан үзен начар хис итә башлый, күтәрелә алмый. Аннары аны коткарырга дип тагын берсе төшә. һәм… шунда ук аңын югалта. Өченчесе дә төшеп, шулай ук аңын югалткач, дүртенчесе ярдәмгә кешеләр чакыра.
Ашыгыч ярдәм өч кешене госпитализацияли. Әмма икесен коткарып кала алмыйлар. Өченчесе реанимациядә – ясалма сулыш алдыру аппаратында.
Җинаять эше кузгатылган. Тиешле шартлар тудырмыйча эшчеләрне куркыныч астына куйган җитәкчеләргә җиде елга ирегеннән мәхрүм ителү яный.
