Думада төбәк укытучыларына кимендә 2,5 минималь хезмәт хакы билгеләргә тәкъдим иттеләр

Дәүләт Думасына укытучыларның хезмәт хакы турында проект кертелгән. Тулы ставкага эшләүче педагогларга депутатлар төбәкнең 2,5 минималь хезмәт хакы күләменнән ким булмаган планка билгеләргә тәкъдим итә. Бу хакта Татарстан Мәгариф һәм фән министрлыгы матбугат хезмәте хәбәр итә.

Исегезгә төшерәбез, 2023 елның 1 гыйнварыннан минималь хезмәт хакы 16 мең 242 сум тәшкил итә.

Россиянең күп кенә төбәкләрендә укытучыларның кереме югары түгел – депутатлар инициативаны шуның белән аңлата. Шул сәбәпле яшь педагогларның мотивациясе дә кими, мәктәпкә алар теләп бармый. Ә провинциядән тәҗрибәле укытучылар еш кына хезмәт хакы югарырак булган башкала төбәкләренә күченә.

2,5 минималь хезмәт хакы – укытучы хезмәт хакына әлеге түбән планканы билгеләргә тәкъдим итәләр.

Шул ук вакытта Россия Мәгариф министрлыгында да мөгаллимнәрнең хезмәт хакы проблемасын хәл итәргә омтылалар. Ведомство башлыгы Сергей Кравцов белдерүенчә, киләсе елда хезмәт хакларын исәпләүгә бердәм алымнар кабул ителәчәк.

Алар категория һәм разрядлар белән ачык һәм төгәл тариф челтәрен күздә тота. Һәр укытучы хезмәт хакын нәрсә өчен алуын аңлаячак.