Дрессировщик Эдгард Запашныйга тигр һөҗүм иткәннән соң, битенә 14 җөй салганнар

Кичә Зур Мәскәү циркының генераль директоры, ерткычлар дрессировщигы Эдгард Запашныйга Рой исемле яшь тигр һөҗүм иткән. Аның битенә 14 җөй салганнар. Бу турыда «Вести» каналы яза.

Запашный сүзләренчә, аның гомеренә куркыныч янамый, хастаханәгә салу таләп ителмәгән, ләкин битенә 14 урында җөй салганнар.

«Бит нервына зыян килмәгән, яралар 1 см чамасы тирәнлектә – борында һәм яңакта. Миңа бәхет елмайды, тигр күземә тимәде, муенны яраламады», – дип сөйләгән ул. Бу турыда РИА Новости язды.

Запашныйның яраларын бүген кабат бәйләгәннәр, ул хәзер шимпанзе һәм филләр белән репетиция ясый башлаган.

«Мин эш режимында инде», – дип аңлаткан Запашный.

Дрессировщик сүзләренчә, тигр аны үтерергә маташмаган, ялгыш бәргән, диелә хәбәрдә.