Лондонда дөньядагы иң озын буйлы һәм иң кыска буйлы хатын-кыз очрашкан. Төрек веб-дизайнеры һәм Һиндстаннан актриса-блогер чәй эчә-эчә гәпләшкән, дип яза «Guinness World Records» сайтына сылтама белән «Российская газета».
Төркиядә яшәүче Румейса Гелджи бүген планетадагы иң озын буйлы хатын-кыз булып санала. 27 яшьлек кызның буе – 215,16 см. Аңа сирәк авыру – «Уивер синдромы» диагнозы куела. Бу авыру булганда гәүдә бик тиз үсә, һәм сөякләр деформацияләнә.
Шулай ук Румейсаның башка рекордлары да бар: ул – иң зур куллы, иң озын аркалы һәм иң озын колаклы хатын-кыз.
Ә дөньядагы иң кыска буйлы хатын-кыз – Һиндстанда яшәүче 30 яшьлек Джоти Амджи, аның буе – 62,8 сантиметр. Аның диагнозы – «ахондроплазия», ягъни сөякләр үсеше бозылу.
Аларның буйлары аермасы 152,36 сантиметр булса да, бу ике кыз тиз дуслашкан, бер-берсе белән тормыш тәҗрибәләрен уртаклашкан. Алар сүзләренчә, уртак кызыксынулары да байтак булган, мәсәлән, икесе дә мода, макияж, маникюр һәм төрле бизәнү әйберләре ярата икән.
