Башкортстанның Борай районы Әрнәш авылыннан Нәбиуллин Динар Дамир улы Украинада һәлак булган. Аны бүген туган авылына алып кайтканнар. Иртәгә, 23 майда, 11.00 сәгатьтә үзәк мәйданда аның белән хушлашу мәрасиме узачак, дип хәбәр итә район башлыгы Рушан Гәрәев.
Динар Нәбиуллин 1988 елның 1 декабрендә Әрнәштә туган, Николаевка авылында урта мәктәпне тәмамлаган. Кызыксынучан, гадел, әйбәт укучы булды, иҗтимагый эштә катнашты, спорт белән шөгыльләнде. Укып бетергәч, тракторчы булырга укыды, дип яза район башлыгы.
2007 елда ул хәрби хезмәткә алына, аннары Сургутка китеп, йөк төяүче техникада эшли. Өйләнә, улына 6 яшь тулган чагында мобилизациягә эләгә.
«Нәбиуллин Динар Дамир улы Борай районының горурлыгы булыр. Аның турында хәтер якыннарының, туганнарының, иптәшләренең күңелендә бетмәс, ә батырлыгы онытылмас», – дип яза район башлыгы.
Динарны белүчеләр кайгы уртаклашу сүзләре язган:
Альмира Галимьянова: «Динар, классташым, бер дә ышанасы килми бит. Бик авыр. Тыныч йокла. Урының оҗмахта булсын. Якыннарыңа сабырлык»;
Зиния Климина: «Балакаем, тыныч йокла, син бурычыңны үтәдең. Без синең белән горурланабыз»;
Динария Хөсәенова: «Динар балакаем, тыныч йокла, урының оҗмахта булсын. Физәлкәем, Дамир, Альбина, сабырлык сезгә».