Динә Латыйпова әтисенең сеңлесе – Мәрьям апасында кунакта: «Безгә кыстыбый пешерә идең»
Әби белән 20 чакрым җәяү килә идек сиңа кунакка, дип искә ала җырчы.
Динә Латыйпова әтисенең бердәнбер кыз туганы – Мәрьям әбисенә кунакка кайткан. Биш туган арасыннан бүген ул гына исән. Мәрьям апага быел 89 яшь тула.
«Безне «абыемның балалары» дип яратучы, кадер-хөрмәт күрсәтүче, миңа матур күлмәкләр тегеп кигезүче апам, исән генә бул!» – дип яза ул.
Эх, үстердең инде! Әби белән 20 чакрым җәяү килә идек сиңа кунакка. Атналап ята идек синдә. Урманнан җиләктән кайтып кермәдек. Синең дә бөтен җиләгеңне ашап бетерә идек. Хәтерлисеңме, безгә кыстыбый пешерә идең. Бер табак чыгарып куясың, без ашыга-ашыга ашыйбыз. Бетә генә, тагын бер табак чыгарасың. Үзеңдә сигез бала, без киләбез, кунаклар кайта, үзегез... Ярата идек сиңа килергә, – дип сөйләшеп утыралар.
Мәрьям әбисе белән җырлап та алалар. «Матурайгансың», – ди апасы Динә Латыйповага.
«Озатып калды, күзләрендә яшь. Минекендә дә… Июльдә авылга, төп нигезенә алып кайтырга, яшьлек сукмакларын узарга вәгъдә бирдем. Югыйсә, туган авылыннан киткәненә 65 ел», – дип яза җырчы телеграм каналында.