Динә Гәрәева коронавирус белән авырган: «Вирусның ныграк тарала баруын онытмагыз!»
«Барс-Медиа» ширкәте җитәкчесе Динә Гәрәева коронавирус белән авырганы хакында хәбәр итте, тамашачыларны сакланып йөрергә өндәде.
«Күпләр мине югалтып өлгерде. Мин кире кайтам. Вирусның җиңел булмаган юлын үттем. Коронавирус белән «яшәгән» кеше буларак, бер-ике сүз әйтәм: вирус беркая да китмәде! Саклык чараларын үтәгез –битлек кию, кул юу һәм башкалар.
Прививкага килгәндә — бу һәр кешенең үз эше, билгеле, әмма вирусның мутацияләнгәнен, ныграк тарала баруын онытмагыз. Табиблар белән киңәшләшегез, кирәкле анализлар тапшырыгыз. Бер-берегезне саклагыз! Иммунитетыгызны күтәрегез! Авырмагыз!
Ул арада безнең эш кайный. «Яңа йолдыз» проектының 2 сезоны, «Татар җыры», «Татар радиосы» ның 20 еллыгына багышланган чараларга әзерләнәбез. Пандемия белән бәйле вәзгыять хәл ителер, авыручылар саны кимер һәм без тамашачы белән күзгә-күз очрашырбыз дип өметләнәбез.
Барыгызга да рәхмәт! Сәламәтлек телим!» — дип язган ул.
«Исән-сау булыгыз! Хәерле булсын!», «Сәламәтлек сезгә», — дип изге теләктә калган инстачылар.