Диләрә Илалетдинова кабак бәлеше пешергән видеоны социаль челтәрләргә куйгач, күп кеше рецептын сораган, араларында «бу нинди ризык» дип аптыраучылар да булган. «Чыннан да, ашап караганнары юктыр инде», дип язган җырчы.
Камыр өчен бер стакан җылы су, калак очы белән генә чүпрә, 1 аш кашыгы майонез яки каймак, шикәр комы, он кирәк. Камырны катырак итеп басарга, кабарганын көтмичә бәлешне ясый да башларга мөмкин.
Эчлек өчен чистартылган һәм туралган кабак, бүрттерелгән дөге, кайнар суда торган йөзем (күрәгә, караҗимеш тә салырга була), шикәр комы, тоз, атланмай кирәк.
«Кабакны шакмаклап турап, шикәр комы белән болгатып куям. Кабак согын чыгара тора һәм шулай тәмлерәк кебек тоела. Эчлек ингредиентларын барысын бергә салып болгатырга, атланмайны кызганмыйча салыгыз. Бәлеш корырак булса, табынга баргәндә җылы сөт өстәгез», дигән җырчы.
Кабак бәлеше духовкада 1-1,20 минутта пешә.
