Дилә Нигъмәтуллина Яльчиктагы фаҗигане үз күзләре белән күргән кызының хәлен сөйләде
Яльчикта давыл котырып, кешеләр һәлак булган кичне Дилә Нигъмәтуллинаның кызы Сәфинә белән ире Илсур да күл буенда ял иткән. Җырчының якыннары гарасатны да, туристлар булган палаткалар өстенә агачлар авып төшүен дә үз күзләре белән күреп торганнар. Дилә Нигъмәтуллина ире белән кызының да бу давылда могҗиза белән генә исән калулары хакында сөйләгән иде.
«Подписчиклары» Сәфинә өчен борчылып сораулар яудырганга, җырчы кызы белән бергәләп сторисларга чыккан.
«Сәфинә хәзер әйбәт инде. Аллаһка шөкер, тынычландык, эмоцияләр сүрелде. Иптәш кызларына сөйләде, сөйләргә сүз булды инде...» – ди Дилә.
«Кешеләр кызганыч… Палаткаларга агачлар сынып төште… Әле дә күз алдымда», – дип кушыла аңа Сәфинә.
«Зур фаҗига инде бу, дуслар. Иң мөһиме – нәтиҗәләр ясарга кирәк инде. Табигать безгә сак булырга куша, сигналлар бирә», – дигән Дилә Нигъмәтуллина.
