Татар дискотекаларын кыздырган, Мәскәү егете, диджей Радик яки Радик Яруллин хәзер гаиләсе белән Казанда яши. Ул «ТМТВ» телеканалының «10 сорау» тапшыруында булды һәм алып баручы Әбри Хәбриевның сорауларына җавап бирде.
– Ни өчен рус эстрадасы артистлары белән эшләмисең?
– Рус эстрадасына күчәргә тәкъдимнәр булды. Чөнки мин – татар, әти-әни – татар. Без – шундый патриотлар! Әгәр мин үземне Россия шоу-бизнесына «тыксам», татарлар өчен булмаячак. Әгәр вакыт һәм көч булса, ике эстрада өчен дә эшләп булыр иде. Минем күбрәк татарлар өчен музыка язасым килә.
– Кемнәр белән эшләдең?
– Мин күбрәк оештыручы буларак эшләдем. Россия эстрадасы җырчылары да бар. Мисал өчен, «Иванушки» төркеме.
– Алар банкетта җырлап китү өчен күпме сорыйлар?
– Хәзер бәяләр артты инде. 1-3 млн сорыйлар...
– Рәхмәт. Син әле Россия эстрадасына кереп китмәгәнсең, сине нормаль бәягә чакырып була.
– «Иванушки», Натали, Игорек, Шура, Никита Малинин, «Премьер-министр», «Руки вверх» белән эшләдек. Алар белән мин элемтәдә, алар кайвакыт миңа мөрәҗәгать итә. Мин ризалашмыйм.
– Рус эстрадасы артистлары аранжировка сораса?
– Анда бәя турында сүз бармый. Мин анда «тыгылсам», анда калам. Миңа татар эстрадасы кирәк булмаячак.