Депутат аерылышкан өчен штраф түләтергә яки хәрби операциягә җибәрергә тәкъдим итә

Россиядә аерылышкан өчен 100 мең штраф салып яки махсус операциягә җибәреп җәза бирергә тәкъдим иттеләр. Бу тәкъдимне Дәүләт Думасы депутаты Виталий Милонов гаиләне яклау, ата-ана һәм балалар мәсьәләләре комитеты утырышында әйткән. Бу хакта «Лента.Ру» сайты яза.

Мөнәсәбәтләрне теркәгәндә ир белән хатынга бердәм түләү булдыру турындагы закон проекты хакында фикер алышканда, Милонов «проблема туйларның аз булуында түгел, ә аерылышуларның күп булуында» дип аңлаткан. Сәясәтче инициативаны яхшы дип бәяләгән, әмма аерылышкан очракта, аны штраф яки хәрби операция зонасында мәҗбүри эшләр белән тулыландырсалар, бу идеяне хуплаячагын әйткән.

«Аерылышкан өчен җәза бирергә кирәк. Ә гаилә кору кеше өчен болай да бәйрәм», – дигән ул.

Моңа җавап итеп ЛДПР депутаты Василина Кулиева Милоновка, тәкъдимнәрне кертеп, үзенең закон проектын әзерләргә тәкъдим иткән.