Данир Сабировтан «ике катлы» пародия: Салават Фәтхетдинов Майкл Джексонга пародия күрсәтә

Данир Сабировның «Ике юбилей» дип аталган моноспектаклен күпләр карарга өлгергәннәрдер инде. Әлеге үзенчәлекле жанрда Данир, һичшиксез, яраткан остазы Салават Фәтхетдиновка чираттагы үзенчәлекле пародиясен ясаган иде.

Ни өчен үзенчәлеклеме? Чөнки бу – катлы-катлы пародия дияргә була. Данир – Салаватка, «Салават» – чит ил җырчыларына пародия уйнаган. Төгәлрәк әйткәндә, имеш, Салават Зәкиевич чит ил җырчыларына пародия күрсәткән.

Дөрестерме, юктырмы, Салават әфәнде яшь чагында чит ил җырчыларын акыртып тыңлый-тыңлый көтү көткән икән. Аның кумирларының берсе Майкл Джексон булган, янәсе. «Салават» Майкл Джексон булып җырлап та күрсәткән.

Озын сүзнең кыскасы, әлеге видеоны күрергә кирәк. Тамашачылары исә Данирның кыланмышларын бик яратып кабул иткән, рәхәтләнеп көлгәннәр.

«Ике юбилей» моноспектакленнән әлеге өзекне сезгә дә тәкъдим итәбез. Йә, ничек соң, нәкъ үзе кебек маташтыра бит Данир, әйеме?

Данир Сабиров «Ике юбилей» моноспектаклен районнарда да күрсәтергә җыена. Сүз уңаеннан, бу – татар эстрадасындагы беренче моноспектакль, ягъни сәхнәдә бер генә кеше – Данир Сабиров кына уйный.