Данир Сабировның хатыны Миләүшә: «Данирның балык тотуы туйдырды»
Юмор остасы, пародист Данир Сабировның хәләл җефете Миләүшә Сабирова иренең балык тотарга йөрергә яратканын, әмма үзенә балык чистарту ошамаганын Инстаграм битендәге сәхифәсендә язган.
«Элек Данир еш кына балык тотарга йөри иде. Туйдырды бу эше…
Дөресен генә әйткәндә, балыкны гел чистартып тору миңа бик ошамады, балыкчыларның хатыннары мине аңларлар дип уйлыйм.
Бервакыт, әле Мәрьям бәләкәй чагында, Азнакайга кунакка киттек. Гадәттәгечә, Данир балык тотарга барырга җыена, ә мин каршы. «Монда күңелсез миңа, минем белән кал», — дим. Юк, балык мөһимрәк, җыенды да китте. Ярты сәгатьтән кире кайта — коты чыккан, аллергиясе башланган! Черкиләрдән кием-салымга гына сиптерә торган спрейны битенә сиптергән!
«Минем ризалыктан башка йөрсәң, шулай була!» — дидем. Шул вакыттан бирле ул балыкка йөрми диярлек», — дигән Миләүшә Сабирова.
«Тоткан балык барыбер тәмлерәк», «Бөтен кешенең дә кереме сезнеке кебек түгел шул», «Мин, киресенчә, балык тотарга яратам, балык тоту — гаиләбезнең йомшак ягы», — дип яза инстачылар.