Юмор остасы, җырчы Данир Сабиров бөек фәлсәфәче, шагыйрь Гомәр Хәйямның: «Без кайвакыт кирәксез теләкләр белән тулы: бер кулда – бокал, икенчесендә – Коръән... Менә шулай зәңгәр күк астында яшибез без – ярым динсезләр һәм ярым мөселманнар» дигән канатлы сүзенә ияреп, үзе турында түбәндәге сүзләрне язып калдырган:
«Көндез – спортсмен, кичен, кайвакыт, спиртсмен. Арасында – артист, җомга көнне – мөселман. Булдыралганча яхшылыклар да эшлим, гөнаһлары да җитәрлек...
И Ходаем, кичер минем иске гөнаһларымны, бир көч яңаларына». Шул рәвешле җырчы бүгенге көндә адәм балаларының төрле тормыш рәвеше алып баруына, яхшы булырга тырышып та, тормыш ләззәтләреннән баш тарта алмавына ишарә ясаган.
Укучыларының бер өлеше Данирны аңларга тырышкан.
«Да, булдырасың барысын да. Исәнлек бирсен бер Аллам. Дөрес әйткәннәр – Аллага ышан, үзеңчә капшан»;
«Шулай инде, кеше хатадан хали түгел.Тормыш шулай дәвам итә...»;
«Гомер бер тапкыр бирелә. Һәрберебезнең үз язмышы. Кемгә кайчан килә ул намазга басу, мәчеткә йөрү. Ялгышларны төзәтик, ә язмышларны үзгәртеп булмый диләр бит», – дип язалар алар.
«Кичен спиртсмен булмасаң иде», – дип киңәш итүчеләре дә булган. Фикерләр арасында: «Бик моңсу...» – дигән комментарий да бар.