Данир Сабиров ничек итеп Салават төркеменә укырга керүе турында сөйләде
Пародист инстаграмдә үз сәхифәсендә биографиясен язуын дәвам итә.
Пародияләр остасы Данир Сабиров инстаграмдә үз сәхифәсендә биографиясен язуын дәвам итә. Инстачылар һәр бүлеген көтеп ала һәм «аз язасың», «көтәбез бит», «иң кызык җирендә өздең», — дип ачуланып та алалар.
Данир чираттагы бүлегендә ничек итеп Салават төркеменә укырга керүе турында язган.
«Салават төркемендә бер генә буш урын, ә анда укырга күчәргә теләүчеләрнең саны — өч. Бер егет курчак театры бүлегеннән, икенчесе театральныйдан, өченчесе мин - хореография бүлегеннән. Комиссия җыелган. Керү белән сораулар яудыралар.
Беренче малай керде дә, Салават абый сорый:
— Кайдан кердең?
— Курчак театры факультетыннан.
— Курчаклар туйдырдымыни? Ярар, нәрсә эшли беләсең?
— Җырлый беләм.
Җырлап күрсәтте.
Икенче малай керде.
— Кайдан кердең?
— Театральныйдан.
— Нәрсә эшли беләсең?
— Монолог сөйлим.
Сөйләде монологын.
Мин кердем.
— Кайдан кердең?
— Бәй, абый, күрмәдегезмени? Ишектән!
— Нәрсә эшли беләсең?
— Нәрсә кирәк — шуны эшлим.
Салават абый акырып көлеп җибәрде һәм шулчак телефоны шалтырады да комиссиягә: «Бу малайда акыл юк, әмма юмор бар. Кәефне күтәрде. Ярар, алабыз!» — диде дә, телефоннан сөйләшергә дип чыгып китте.
Ура! Мин Салаватта укыйм! Ике җөмлә әйткән өчен укырга алдылар», — дип язган юморист.