Данир Сабиров матур әниләрне аулак өйгә чакырган
Юмор остасы дүрт бала белән төшкән фото куйган.
Юморист Данир Сабиров үз сәхифәсендә дүрт бала белән ялгыз калуы турында хәбәр итә.
«Бүген мин герой ата. Балаларның әнисе Төркиягә очты, балаларның анасының әнисе дә аның белән китте. Минем әни эштә. Азнакайда миңа ярдәм итәргә теләүче матур әниләр булса, рәхим итегез! Вакытны бушка уздырмыйк», — дип язган ул.
Артистның виртуаль дуслары кайгырыша да башлаган. Кемдер Данир янына өелешеп хатын-кызлар килеп керер, икенчеләре бу сүзләрне хатыны укыгач самолетны кире борыр дип борчылган.
«Өелеп килеп керсәләр, нәрсә эшләрсең, Данир? Үтерәләр бит», - дип кайгыручыга: «Һәр нәрсәнең бар җае, арбаның да бар мае дигән кебек, җайланыр әле шунда», - дип җавап язган юморист.
«Миләүшә Төркия дип үлә инде. Шунда күченеп китегез инде», - дип язган инстачыга Данир: «Менә шуны сөйләшергә дип китте бит инде», - дигән.