Данир Сабиров инстадусларын Кемаль белән таныштырды
Җырчы дустын, «Әле дә син бар әле дөньяда» җырын башкарып, бәйрәме белән котлаган.
«Этләр көне белән тугры дусларыбызны! Этебез Кемаль — гаиләбезнең лаеклы әгъзасы. Ул да тренировкага йөри, ул да диетада утыра, ул да Кәшифә (песи — ред.) белән уртак тел таба алмыйча, тавыш чыгара.
Күбегез беләдер инде: Кемаль — төрек сериалындагы герой. Хәятем Миләүшә аңа гашыйк. Шуңа күрә әлеге исемдә тукталдык. Гомумән, безнең йортта бөтен әйбер төрекләшеп бара. Кәшифә Ниханга әйләнмәсә ярый инде», — дип көлә ул.
Видео астында инстачылар калдырган комментарийлар да бик кызык.
Берсе: «Безнең дә кияү Кемаль исемле. Төркиядә яши», — дип язган.
Икенчеләре: «Бу абый үз акылында микән дип карап тора бу Кемаль»;
«Диетада утырмыйча кая барсын син гастрольдә йөргәндә»;
«Эткә җыр бүләк итмиләр, сөяк, ит кирәк аңа. Алдында берни юк бит», — дигәннәр.
Күпчелек инстачылар Данирның этен ач тотмавына ышана. «Кеше этегезне ач тотасыз димәкче була. Эт тә режим буенча ашарга тиеш инде. Гел алдында ашарга торса, ул, бердән, бозыла, икенчедән, симерә. Минем эт симереп үлде, мәсәлән».
«Сөякнең ашар җире юк, ә Кемальнең тамагы тук. Аңа хуҗасының уйнавы кирәк. Сезгә генә ул һаман ашарга кирәк. Игътибар дигән әйберне онытмагыз», — дип яклап чыкканнар алар җырчыны.