Данир Сабиров гаиләсе турында биш факт әйтте
Сабировлар гаиләсендә акча Миләүшә Сабирова кулында.
Артист Данир Сабиров инстадусларын Халыкара гаилә көне белән котлаган һәм бәйрәм уңаеннан гаиләсе турында 5 кызыклы факт язган.
Данир белән Миләүшәнең гаилә корып яши башлауларына 13 ел булган. Гаилә бюджеты Миләүшәдә икән. «Чөнки миңа шулай уңайлырак», — ди Данир.
Сабировлар гаиләсендә бәйрәм табыны күрке — Данир пешергән пылау. Шулай ук артист барлык гаилә әгъзаларының телефонында парольнең бертөрле булуы һәм барысының да спорт белән шөгыльләнүләре турында язган.
Инстачылар гаиләнең искиткеч матур фотоларына сокланган. Аларның бер-берсен гел шулай саклап, яратып яшәүләрен теләгән.
«Бары тик чын ир-ат кына акчасының хатыны кулында икәнен әйтә. Булдырасың, энем», «И, монда да шаяртуыңны дәвам итәсең, хатын пешергән коймак дисәң, дөресрәк булыр иде»,«Данир, сез искиткеч, сокланып туймаслык гаилә. „Йолдыз“ чире генә берүк кагылмасын үзеңә, Данир», «Данир әфәнде, пылауны оста пешерсәгез, безне дә өйрәтегез әле», — дип тә язганнар.