Җырчы, юмор остасы Данир Сабировка шушы көннәрдә гадәти булмаган бер мәҗлестә катнашырга туры килгән. Бу хакта ул социаль челтәрләрдә язган:
– 2 июнь көнне мәҗлескә төркемем белән эшләргә чакырылган идем. Матур мәҗлескә, дип искәртим әле: балалары әниләренә күчтәнәч ясарга теләгән иде. Бик әзерләнелгән юбилей... Әмма көтмәгәндә ут сүнде! Ә без ситуациядән чыгу юлын таптык: телефон утларын куеп, барлык килгән артистлар баянга җырлап, гомергә хәтердә калырлык итеп бәйрәм иттек. Җылы, рәхәт кич булды.
Нинди генә кыенлыклар очрамасын, һәр хәлдән чыгу юлын табып була. Бәйрәмнең атмосферасы – шушы видеода. Иренми карап чыгыгыз әле. Кабатлап әйтәм: шундый рәхәт булды, махсус утны сүндереп, тагы бер бәйрәм итәсе килә хәзер! – дигән Данир.
Видеоны караучылар: «Тере тавышка – җанлы концерт. Менә шунда күренә инде артистларның сәләте. Чын җырчылар шулай булырга тиеш. Югалып калмаска! Афәрин», «Аның каравы «от души», «Элеккечә, ихлас булган», «Бигрәк рәхәт утыргансыз», «Элек артистлар шәм тотып баянга җырлаганнар, борчылмагыз, артист икәнегез шунда сынала», «Иң яхшы концерт!», «Данир булган җирдә маҗараларсыз гына булмас...» – дигәннәр.