Элвин Грейның туган көн концертында чыгыш ясаганнан соң юмор остасы, җырчы Данир Сабировка бер тамашачы чәчәк бәйләме бүләк иткән.
«Зур рәхмәт, менә бу – популярлык инде, брат. Ә минем туган көндә сиңа чәчәк бирмәгәннәр иде.
Мин алдан сөйләшеп куймадым, бәлки, син кайгырткансыңдыр? Сөйләшеп куйсам да, «сөйләштем» дип әйтә алмыйм бит инде мин аны. Ну ярар, братан, туган көнең белән! Тешләреңне сакла! Синең бер тешең генә дә – минем бер концерт», – дигән шуннан соң Данир, дустын туган көне белән котлап.
Инде сәхнәдән төшеп баручы Данирны Элвин Грей яңадан чакырып ала. Нәрсәдер әйтмәкче булган Элвин Грейга җор телле Данир тагын авыз ачарга да ирек бирми:
«Өченче җырны әзерләмәдем, брат. Сөйлим, ләкин татарча сөйлим инде, яме. Минем русчам – синең татарчаң кебегрәк», – дип төрттерә, чыннан да татарчасы чиле-пешлерәк булган Элвин Грейга. Яңадан шул чәчәк темасына кайтып, Данир бер кызык хәл дә сөйләп ала.
«Солянка концерты бара икән. Артык танылмаган артист бер малайга акча бирә дә: «Шушы акчага чәчәк сатып ал да мин җырлагач, бүләк итәрсең», – ди. Артист чыгыш ясаганнан соң, теге егет сәхнәгә чыга да башта чәчәген тоттыра, аннан кесәсеннән чыгарып: «Монысы сдачасы», – ди.
Халык шау-гөр килеп көлешә. Ә Элвин Грей Данирга: «Син – нормальный пацан», – дип бәя бирә.
«Принял! Пацан сказал, пацан сделал, пацан уехал», – дип җавап кайтара аңа Данир.
Күңелле видео белән «Татарлар дөньясы» «Телеграм» каналы бүлешкән.