«Дакар» раллие вакытында Татарстанның «КАМАЗ-Мастер» машинасы тамашачыны таптаган - видео

«Дакар» ралли-марафонында катнашучы «КамАЗ-мастер» машинасы тамашачыны бәрдергән. Шуннан соң Андрей Каргинов экипажын дисквалификацияләгәннәр. Бу турыда НТВ каналы сөйләде.

Вагыйга раллиның бишенче этабында Перуда була. Катлаулы тауларның берсендә тамашачылар җыелып баса. Калкулыкка менгәндә пилот теләсә-кайда басып торган кешеләрне урап узарга тырыша. Тамашачылар йөгерешә башлый һәм аларның берсе йөк машинасының арткы тәгәрмәче астына эләгә.

Андрей Каргинов үзе авария мизгелен күрмәгән һәм соңрак кына белеп алган. Имгәнгән тамашачының сәламәтлеге турында хәбәр ителми.

Шулай итеп, Андрей Каргинов экипажы ярыштан төшеп кала. Алар тамашачылар өчен кагыйдәләрне катгыйландыруны сорый, диелгән әлеге хәбәрдә.  

• Дакар ралли-марафоны Перуда уза. Ул 17 гыйнварда Лимада төгәлләнәчәк.