Дагыстанда ял иткәндә катердан суга егылып төшкән хатынны коткарган ир үзе һәлак булган

Дагыстанда Сулак тарлавыгында катерда йөргәндә бер ир-ат һәлак булган. Ул суга егылып төшкән турист кызны коткарырга тырышкан.

Суга чыгар алдыннан катерны йөртүче коткару жилетлары кимәскә рөхсәт иткән һәм бик кызу йөргән.

«SHOT» Телеграм-каналы ачыклаганча, алдагы көнне 5 кеше – 4 хатын-кыз һәм 1 ир-ат каньонда катерда йөрү өчен юллама ала. Суга чыгар алдыннан туристлар катер йөртүчедән бу сәяхәтне мөмкин кадәр экстремаль ясавын сорый. Тик, күрәсең, йөртүче артыгын тырышып ташлый.

Юлда гид куркыныч маневрлар ясап, төркемне шаккатырырга тели. Шундый маневрларның берсендә пассажир хатын-кыз суга егылып төшә. Катердагы 55 яшьлек Арыслан аны коткарырга ташлана. Ахырда, ир үз гомерен корбан итеп, суга батучы хатынны коткара.

Катер йөртүчесен тоткарлаганнар. Җирле Тикшерү комитеты «Диңгез транспортын куллану һәм иминлек кагыйдәләрен бозып, саксызлык белән кеше үтерү» маддәсе буенча җинаять эше ачкан.

Һәлак булган герой элек тә кешеләрне коткарган булган инде – ул «ашыгыч ярдәм» машинасы йөртүчесе булып эшләгән.