Дүртенче тапкыр әни булган Лилия Муллагалиева әниләргә киңәш бирә: "Дүртенчегә барырга куркып тормагыз, дүртенчесе бик тиз туа икән!"
Татарстанның атказанган артисты Лилия Муллагалиева дүртенче бала тапканнан соң, Инстаграм битендә хис-кичерешләре белән уртаклашты.
"Кадерле туганнарым, дусларым, яраткан тамашачыларым!!! Шундый күп матур теләкләр язгансыз. Комментарийләр искиткеч мәгънәле, барыгызга җавап биреп, рәхмәт әйтәм!!! Балакайларыбыз сау-сәламәт булсыннар!!! Игелекле, иманлы, тәуфиклы, пар канатлы, әти-әниле, озын гомерле, бик бәхетле булсыннар!! Аллакаем рәхмәтеннән, ярдәменнән ташламасын!!!
Күзгә йокы керми... Уйланып, шатланып, ниндидер халәттә барысын күз алдыннан кичереп ятыш... Авырлы булып, ах-пух килеп 9 ай йөрүе үзе бер күңелле, рәхәт чор! Ә инде бәбиеңне кулга алып, сөеп, иснәп, күзенә караган минутлар иң кадерле, иң онытылмас бәхетле мизгелләр!!!
Мин дә бүген кечкенәбезне 2 сәгать күкрәгемә кысып, кечкенә кулларыннан үбеп, яратып, назлап, бары тик әни белән бала арасындагы тирән мәңгеле якынлыкны тоеп яттым... 16 ел элек беренчебез Данилны тудырган, 10 ел элек кызыбыз Ильвинаны тудырган, 3 ел элек кенә җимешебез Ильясны тудырган минутлар искә төште. Бер карасаң, онытылган да кебек, ә бер карасаң, бар да кичәге кебек күз алдында...
Сүземне төгәлләп, бүгенгә шуны әйтәсем килә: бала шатлыгын күреп, куанып яшәргә язсын!!! Шуны да әйтим, дүртенчегә барырга куркып тормагыз! Дүртенчесе бик тиз туа икән", - дип язган җырчы.
Лилия Муллагалиевага ихлас теләкләр дә теләп язганнар: "Ихлас йөрәктән тәбрик итәм! Сау-сәламәт, әтиле-әниле, хәерле-бәрәкәтле, озын гомерле, тәүфиклы, иманлы, бәхетле сабыйлар булсыннар, күз алмасыдай саклап баккан сабыйларыгыз!", Котлыйбыз сезне! Мин чын йөрәктән ак көнләшү белән көнләшәм, сез герой! Чын мәгънәдә, бернидән курыкмыйча бәхетле мизгелләр кичерәсез! Исән-сау булыгыз!", "Сезгә һәйкәл куярга кирәк, Лилия!"