Дүрт яшьлек сабый әнисен эзләргә дип өйдән качып чыгып киткән
Өйдәге өлкәннәр сабыйның җиңелчә генә киенеп чыгып киткәнен күрми калган.
Мәскәү өлкәсендәге Солнечногорск шәһәрендә дүрт яшьлек кыз бала туганнарыннан качып, өйдән чыгып киткән. Ул эшкә киткән әнисен эзләргә дип шоссе буйлап юлга чыккан. Бу турыда «Вести» каналы хәбәр итте.
Юл буйлап баручы кызчыкны узып баручылар күреп ала. Алар полициягә хәбәр итәләр. Хокук саклаучылар бу урынга бик тиз килеп җитә һәм сабыйны әнисе янына илтеп бирәләр.
Видео кадрларыннан күренгәнчә, кыз өстенә бер кат кофта гына кигән. Полиция аны Пятницкий шоссесының 43нче километрында АЗС янында таба. Алар дүрт яшьлек сәяхәтчене машинага утырталар, кәнфит бирәләр һәм сораштыралар. Автоинспекторлар янында җылынгач, кыз тынычлана. Ул үзенә дүрт яшь булуын сөйли, исемен дә әйтеп бирә. Сабый анасының кайда эшләгәнен дә аңлата ала.
Шуннан соң тиз арада кызның әнисен табалар.
Баланың анасы сүзләренчә, ул иртән эшкә китә, кызын туганнары белән калдыра. Сабый алардан бик тиз туя һәм әнисен эзләргә чыгып китә. Шулай итеп кыз шоссега кадәр барып җитә. Хәзер Солнечногорск шәһәрендә яшәүче 37 яшьлек хатынга балигъ булмаган баласын тиешенчә карамаган өчен штраф түләтүләре ихтимал. Бу турыда Россия Эчке эшләр министрлыгының рәсми вәкиле Ирина Волк сөйләгән.