Краснодардагы күп фатирлы йорт ишегалдындагы аттракционда бер бала имгәнгән. «Чыгырдан чыккан әйләнгечне» көч-хәл белән генә туктатканнар. Бу турыда «Комсомольская правда» хәбәр итте.
Әлеге вакыйганы күзәтү камерасы төшереп ала. Малай әйләнгеч-карусельгә баса, аннары әйләнә башлый. Әйләнә-тирәдә башка балалар уйный, өлкәннәр дә басып тора. Ләкин әйләнгечтәге баланың тизләнә-тизләнә әйләнүен беркем дә абайламый кала. Бер мизгелдә бала аяктан егыла, аннары аттракцион канатына эләгеп кала.
Әйләнгеч баланы берничә минут әйләндерә. Шуннан соң гына якындагы әти-әниләр килеп җитә һәм аттракционны тормозлый башлый.
«Бу котырган әйләнгечтә тагын гадәттән тыш хәл. Баланы ашыгыч ярдәм алып китте. Нинди травмалары бардыр – белмибез. Күз алдына китерергә дә куркыныч. Яхшы булсын, дип өметләнәбез», – ди биредә яшәүчеләр.
«КП» хәбәрчесе ачыклаганча, биредәге ата-аналар әлеге әйләнгечне алып ташлауны инде берничә тапкыр сораган. «Бу әйләнгечтә күпләр иминлек кагыйдәләрен үтәми. Әти-әниләрен тыңламыйлар, бик тизләнеп әйләнәләр. Бу малай беренчесе түгел инде. Башка балалар да башларын ярганнары бар», – ди Ирина.
Хәзер бу вакыйганы Тикшерү идарәсе өйрәнә, аннары процессуаль карар кабул ителәчәк, диелә хәбәрдә.