Чуваш республикасының Вурнар районында (Канаш, Комсомол районнары белән чиктәш) газүткәргеч яна. Шаһитләр әйтүенчә, янгын көчле шартлаудан соң башланган. Бу хәл Ямбахтино һәм Калинино авыллары арасындагы газүткәргечтә, дип язалар.
Бу Себердән Европага газ кудыра торган Уренгой – Помары – Ужгород газүткәргечендә булган.
«Çĕнтерý çулĕ» газетасы язуынча, газүткәргечтә төзелеш эшләре барган булган. Өч кеше һәлак булган, бер кеше тән җәрәхәтләре алган. Шартлау урыны Ямбахтино авылыннан 600-700 метр гына ераклыкта икән. Газүткәргеч янган урынга Вурнар районы башлыгы Андрей Тихонов килгән.
Авылга куркыныч янамый, дип хәбәр ителә.
Газүткәргечне вакытлыча япканнар. Европага газ башка үткәргечләрдән җибәрелә, дип хәбәр итә РИА Новости.
