COVID-19 белән авырганда канда шикәр микъдары артса нишләргә?
Канда шикәр микъдары артуны «узар әле» дип көтәргә ярамый.
Коронавирус белән авырганда канда шикәр микъдары арту диабет авыруы турында кисәтергә мөмкин. Бу турыда «Татар-информ» хәбәрчесенә Татарстан Сәламәтлек саклау министрлыгының баш терапевты, РКБның терапия клиникасы җитәкчесе Диана Габделганиева сөйләгән.
«Коронавирус шикәр диабеты китереп чыгарырга яки инфекциягә кадәр билгеле булмаган яшерен шикәр авыруын күрсәтергә мөмкин», — ди табиб.
Әгәр шикәр микъдары норма саннарыннан югарырак булса, холестерин да артса, аны тикшереп, дәвалау билгеләргә кирәк.
Анализ начар булса — аны тикшерергә кирәк, участок табибына мөрәҗәгать итү хәерле.
«Кирәк булса, шикәр диабетына шик туса, пациентны эндокринологка җибәрәләр, аны күзәтәләр һәм дәвалау билгелиләр. Шикәр микъдары артуны санга сукмыйча, „узар әле“ дип йөрергә ярамый», — ди табиб.