Миләүшә Сабировадан чизкейк рецепты

Бик җиңел генә ясала.

Ингредиентлар: 240 грамм «Юбилейная» печеньесы, 50 грамм атланмай, 4 йомырка, 400 грамм йогырт, 400 грамм эремчекле сыр, 200 грамм (баллы яратучылар күбрәк сала ала) шикәр комы, бер чеметем тоз, бизәү өчен — җиләк-җимеш һәм бөтнек.

Печеньены блендер яки уклау белән вакларга, эретелгән атланмай салып болгатырга. Төбе алына торган табага пергамент кәгазе җәяргә һәм печенье вагын тыгызлап җәяргә.

Эчлек өчен ингредиентларны блендер белән болгатырга. Әгәр дә эчлек артык сыек булса, бер аш кашыгы он салып болгатырга мөмкин.

Эчлекне табага салырга һәм 110 градуска кадәр кызган духовкада 2 сәгать пешерергә. Аннары чизкейкны суытырга һәм бизәргә мөмкин.