Гөлнара Габидуллинадан тутырылган татлы борыч рецепты

Җырчы Гөлнара Габидуллинадан тутырылган татлы борыч рецептын тәкъдим итәбез.
Ингредиентлар: татлы борыч, фарш, дөге, суган, тоз, борыч.

Татлы борычларның төбен түгәрәкләп кисәргә, эчендәге орлыкларын алырга кирәк. Дөгене бераз гына бүрттереп алырга, саркытырга һәм ит белән кушарга, вак итеп турап суган салырга.

Шул массаны борыч эченә тутырырга. Суга салып әзер булганчы пешерергә. Борычлар пешә торган суга да бераз тоз салырга кирәк.

Пешкән борыч өстенә салу өчен: кишер, суган, сарымсак, яңа өзелгән помидор, тоз, үсемлек мае, су.

Кишерне эре угычтан уарга, суганны, сарымсакны ваклап һәм помидорны шакмаклап турарга кирәк. Барысын бергә үсемлек маенда бераз гына кыздырырга һәм тоз сибәргә, өстен каплап пешереп бетерергә.