Табиблар танылган актер Павел Баршакның гомере өчен көрәшә. Кабыргалары һәм күкрәк читлеге сынган актерны хастаханәгә алып килгәннәр һәм операция ясаганнар. Бу хакта«Комсомольская правда» сайты яза.
42 яшьлек актер 8 октябрь төнлә 32 яшьлек Анастасия исемле хатын янына килә. Ул циркта балерина булып эшләгән. Кыз Александр исемле ирнең гел шалтыратуы, «кызның йөрәген һәм кулын» соравын әйтеп зарлана. Бераздан Александр шалтырата, трубканы Павел ала һәм Настяны онытырга куша.
Бераздан егет белән кыз балконга чыгып утыра. Александр үзе дә пәйда була. Болар фатирга кереп китәләр. Әмма Александрдан болай гына котыла алмыйлар – ул балконга үрмәләп менә, фатирга керә һәм Павел белән кызны бүлешә башлый. Бәхәс сугышка әйләнә: Александр Павелны кыйнап ташлый да килгән юлыннан – балконнан чыгып та китә. Ул өй арестында булган, аягында браслеты да була.
Иртән Павел сериал төшерергә барырга тиеш була. Сериалга бара, әмма съемкаларда катнаша алмый – үзен начар хис итә башлый да хастаханәгә бара. Аның кабыргалары сынган һәм күкрәк читлегенә зыян килгән икәнлеге ачыклана. Башта кабыргалары үпкәсен тишкән, дип тә шикләнгәннәр.
Июль аенда гына Баршак хастаханәгә эләккән була. Ул вакытта да шул ук Настя аркасында. Мәскәү урамыннан барганда, кыз белән егет талаша башлый. Павел һәм Настя артыннан өч егет барган була. Егетләр чибәр актрисаны усал егеттән якларга теләп, аны кыйнарга ябыша. Берсе актерның аягына һәм аркасына суга. Павел машиналар арасына асфальтка барып төшә һәм башын бәрә.
Хастаханәдә бәла өстенә бәла килгәнен ачыклыйлар. Павелның кулы сынган була, анда тимер куялар. Кыйнаганда шул тимер урыныннан чыккан була, Павелга яңадан операция ясыйлар.
Анастасия әйтүенчә, шушы сугышта кулын авырттыру сәбәпле, Павел Александр белән рәтләп сугыша алмаган. «Павелның шул сугышканнан соң бер кулы эшләми диярлек. Шуңа да ул рәтләп селтәнә алмады, шуның аркасында җәрәхәтләр алды», – дигән Анастасия.
«Хәзер ул хастаханәдә, дәвалау күпме барыр, бу аның сәламәтлегендә ничек чагылыр икәнен белмим», – дигән хатыны Мария.
Павел Баршак – бик популяр актер, ул күп сериалларда һәм фильмнарда төшә: «Прогулка», «День выборов 2», «Елки», «Каменская», «Три мушкетера», «Ночной продавец», «Убойная сила» һ.б. Ул «Три мушкетера» фильмында Арамис буларак танылу ала. Беренче хатыны Аннадан Федор исемле улы, икенче хатыныннан Фома исемле улы бар.
Баршак хәзер өченче хатыны – Мария Баршак белән яши. Мария шоу-бизнес өлкәсеннән ерак, аларның Прасковья исемле кызлары бар.
Павел Баршак хатыны һәм кызы белән
Павел Баршак хатыны Мария белән