Чистай мәктәбендә булган хәл итурында «Mash Iptash» каналы яза.
Бу хәл 16нчы мәктәптә була, дип яза канал. 7 класс укучысы физкультура дәресендә үзен тәртипсез тота, укытучыга начар сүзләр әйтә. Технологиядән укыткан укытучы укучыны мәктәптән тыш урында «сөйләшергә» чакыра. (Бу хакта соңрак укучының туганы әйткән).
7 класс укучысы сөйләшүгә 11 класста укыган дустын да чакыра. Очрашуга укытучы алданрак килә, алар укучы белән очрашмый калалар.
Икенче көнне укытучы 7 класс укучысын өстерәп алып кереп бугазыннан тота, чигәсенә дә суга, иренен яра (бу сүзләрнең никадәр дөрес икәне билгеле түгел, укучылар сөйләгәннәрдән генә). 11 класс укучысы иптәшен яклагач, аңа да эләгә.
Укучы белән укытучыны директор гына аралый. Мондый конфликт мәктәптә беренче тапкыр, укучыларның ата-аналары полициягә гариза язмаган.
Комментарийларда укытучыны яклыйлар, аны чыгырыннан чыгарган укучыны гаеплиләр. Кайберәүләр, билгеле, укытучы гаепле, дигән фикердә.