Чувашиянең Батыр районында бер өйдә дүрт кеше янып үлгән
Ике хатын-кыз һәм ике ир-ат мәетен тулысынча янып беткән өй хәрабәләре арасыннан табалар.
Чувашиянең Батыр районында урнашкан Алманча авылында бер өйдә ике хатын-кыз һәм ике ир-ат янып үлгән. Бу турыда Россия Тикшерү комитетының Чувашия Республикасы буенча Тикшерү идарәсе хәбәр итте.
Бер катлы агач йортта янгын узган төндә була. Утны сүндереп бетергәч, хәрабәләр арасында йортның 55 яшьлек хуҗасы, аның өч танышы - 47 яшьлек ир-ат, аның 40 яшьлек хатыны, шушы авылда яшәүче 49 яшьлек хатын мәете табыла. Йорт тулысынча янып беткән.
Тикшерү эшләре бара, диелә хәбәрдә.