Чистай районы Кече Талкыш авылында 69 яшьлек ирне үгез сөзеп үтергән
Кичә 31 июль көнне кичен Чистай районы Кече Талкыш авылында 69 яшьлек ирне үгез сөзеп үтергән. Россия Федерациясе Тикшерү комитетының Татарстан буенча тикшерү органнары башлангыч тикшерү уздыра. Бу хакта РФ ТКның Татарстан буенча идарәсе җитәкчесенең өлкән ярдәмчесе хәбәр итә.
Якынча мәгълүматлар буенча, үгезнең хуҗасы исерек халәттә тышкы абзар киртәсен җимерергә җыенган терлек янына керә. Үзе белән элек тә үгезгә суккан таягын да ала. Ярсыган үгез хуҗасын абзарның киртәсенә китереп кыса. Алган җәрәхәтләрдән ир-ат урында ук вафат була.
Бу фаҗиганең барлык нечкәлекләрен ачыклауга юнәлдерелгән чаралар үткәрелә. Тикшерү нәтиҗәләре буенча процессуаль карар кабул ителәчәк.