Чиләбедә яшәүче ир интернет аша кечкенә баланы биш мең сумга сатарга теләгән
Билгесез зат исемен «Вячеслав» дип язып, белдерүен интернеттагы игъланнар сайтының «Табак-савыт» сату бүлегенә урнаштырган.
Чиләбедә яшәүче бер ир-ат бала сату турындагы белдерүен интернеттагы игъланнар сайтында бастырган. Иң гаҗәбе, баланы биш мең сумга сатуын, үзен «Вячеслав» дип язган ир, әлеге сайтның «Йорт һәм дача» бүлегендә «Табак-савыт» сату өлешенә урнаштырган. Бу хакта «РИА-Новости» хәбәр итә.
Белдерүгә ул кыз бала сурәтләнгән фото да беркеткән. Автор баланың бәясен биш мең сумга бәяләгән. Игъланда кызның исеме «Маша» диеп куелган.
Әлеге белдерүне күрүчеләр аптырашка калып, шунда ук хокук сакчыларына хәбәр иткән. Полиция, бу эш белән кызыксынып, тикшерү эше ачкан. Тикшерү вакытында әлеге шаккатыргыч игъланны куючының Чиләбе кешесе булуы ачыкланган. Шунысы гаҗәп, әлеге белдерү хокук сакчылары башлаган эштән соң юкка чыккан.
«РИА - Новости» белдергәнчә, эчке эшләр органнары әлеге факт буенча җентекле тикшерү алып барачак. Чөнки сүз кеше белән сату итү турында барырга мөмкин.
Әлбәттә, әлеге хәлне интернет кулланучылар кемнеңдер уңышсыз шаяртуы булырга мөмкин дип тә фаразлый.
Хәзерге вакытта моның чынмы, я булмаса шаярту булганлыгын тикшерү органнары ачыклаячак .