Өченче сыйныфта укучы кызлар мәктәптә күмәкләп сугышкан

26 февральдә Мәскәүнең 67нче номерлы мәктәбендә өченче сыйныф балалары күмәкләп сугышкан. Өч кызны хастаханәгә китергәннәр. Бу турыда РБК сайты Мәскәү буенча Эчке эшләр министрлыгы идарәсенә сылтама белән хәбәр итә.

2009 елда туган ике кызны, 2010 елда туган бер кызны Г. Н. Сперанский исемендәге хастаханәгә китергәннәр. Ике кызны дәвалау өчен хастаханәдә калдырганнар. Өченче кызның әти-әнисе хастаханәгә ятудан баш тарткан. Кызларның эче имгәнү, баш мие травмасы булуы, баш мие селкенүе ачыкланган.

Мәктәп директоры Андрей Козлов вакыйга турындагы мәгълүматны РБК сайтына раслаган. Ләкин ул күмәк сугышның сәбәпләре турында сөйләмәгән. «Әйе, бу хәл бездә булды. Башта үзебез тикшерәбез. Аннары пресс-релиз чыгарырбыз. Телефоннан аңлатма бирмим», — дип әйткән директор.

Вакыйга турында мәгълүматны полиция бүлегендә дә раслаганнар. «Дорогомилово районы буенча полиция хезмәткәрләре 26 февральдә Дорогомилово районындагы мәктәптә булган вакыйганың сәбәпләрен ачыклый. Балигъ булмаган берничә кыз медицина оешмасына ярдәм сорап мөрәҗәгать итте», — дип аңлатканнар Эчке эшләр министрлыгының Мәскәү буенча идарәсендә.

Г. Н. Сперанский исемендәге шәһәр клиник хастаханәсенең белешмә бүлегендә комментарий бирүдән баш тартканнар.