Чечня башлыгы Рамзан Кадыров 200 кияүгә кәләше өчен калым түләргә ярдәм итәчәк
Кәләшне алырга бары тик ике машинада гына барырга ярый.
Чечня Республикасы башлыгы Рамзан Кадыров республикадагы кияүләргә кәләш өчен калым түләргә акча бүлеп бирергә кушты. Ул пандемия вакытында өйләнергә җае булмаган егетләрнең хәленә керергә булган. Бу турыда РИА Новости хәбәр итте.
«Республика башлыгы йөкләмәсе буенча, бөтен төбәкләрдә дә өйләнергә теләгән, ләкин финанс кыенлыклары булган егетләр исемлеге төзелде. Әхмәт-хаҗи Кадыров төбәк фонды әлеге исемлек буенча, 207 кәләш өчен калым түләргә акча бүлеп бирде», диелә Чечня мөфтияте хәбәрендә.
Кияү гаиләсенә 50 мең сум бирәләр. Бу акчага ул никах укыта, кәләш өчен түләүләрне бирә. Аннары бу акча кәләшкә бүләк була.
Пандемия булу сәбәпле, кәләш алырга бары тик ике машинада гына барырга ярый, тантанада якын туганнар гына катнаша ала.
Апрель башыннан алып Чечняда никах укытулар тыелган иде, дистәләрчә туй булмый калды. 25 майда чикләүләр бетерелде.