Чана шуганда коега төшеп киткән баланы сигез сәгатьтән соң тапканнар
Канализация коесына төшеп киткән биш яшьлек кыз исән калган.
Көньяк Сахалин шәһәрендә биш яшьлек бала чана шуган вакытта югала. Аны сигез сәгать эзләгәч, канализация коесында табалар. Сабый исән. Бу турыда РЕН ТВ каналы хәбәр итте.
Кыз баланы хастаханәгә озатканнар. «Сәламәтлеге канәгатьләнерлек», — дип аңлатканнар төбәк буенча Гадәттән тыш хәлләр министрлыгында.
Кыз бала кичке бишләр тирәсендә таудан чана шуарга чыгып китә һәм югала. Аны эзли башлагач, Тикшерү комитеты җинаять эше дә ача.
Хәзер вазифаи затлар, канализация коеларын карап тора торган коммуналь хезмәт вәкилләре эшчәнлегенә хокукый бәя биреләчәк, диелә хәбәрдә.