Чаллыда зур вазифадагы полиция хезмәткәре машинасы 8 яшьлек баланы бәрдергән
Полиция хезмәткәре вазифасыннан азат ителәчәк һәм законда каралган тәртиптә җәзага тартылачак.
Чаллыда узган шимбә көнне җинаятьчеләрне эзләү бүлеге башлыгының урынбасары булып эшләүче 46 яшьлек ир-ат машинасы белән 8 яшьлек баланы бәрдергән. Малай самокатта бара торган булган. Бу турыда «Татар-информ» хәбәр итте.
Авария Беляев урамындагы йортларның берсе янында була. Самокатка баскан бала юлга килеп чыга. Уң якка борыла торган машина аны бәрдерә. Хастаханәдә медицина ярдәме күрсәткәч, баланы өенә кайтарып җибәргәннәр.
«Татар-информ» белешмәсе буенча җинаятьчеләрне эзләү бүлеге башлыгының урынбасары исерек килеш рульгә утырган булган. Хезмәт тикшерүе башланган.
«Челнинские известия» Татарстан буенча Эчке эшләр министрлыгына сылтама белән хәбәр иткәнчә, бу полиция хезмәткәрен эштән азат итәчәкләр.
Полиция хезмәткәре «Сузуки» автомобиле белән идарә иткән вакытта эштә булмаган. Медицина тикшерүе нәтиҗәләре аның исерек булуын күрсәтә. Хезмәт тикшерүе билгеләнде. Хезмәткәр эчке эшләр органнарыннан вазифасыннан азат ителәчәк һәм законда каралган тәртиптә җәзага тартылачак. Аның җитәкчеләре дә дисциплинар җаваплылыкка тартылачак, дип аңлатканнар «Челнинские известия» сайтына Татарстан буенча Эчке эшләр министрлыгының матбугат хезмәтендә.
Якынча белешмә буенча, «Сузуки Гранд Витара» машинасын йөртүче уңга борылганда самокатта баручы җәяүлегә юл бирми. Нәтиҗәдә 8 яшьлек бала имгәнә, диелә хәбәрдә.