Чаллыда яшәүче кызны исерек егете фатирда бикләп куйган
Кыз төн уртасында тәрәзәдән кычкырып, коткаручылар чакырган.
Чаллыда 26 февральгә каршы төндә ГЭС бистәсендә яшь кыз узып баручылардан ярдәм сораган. Ул төнге икеләр тирәсендә өченче кат тәрәзәсеннән кычкырып игътибар җәлеп иткән. Бу турыда «Челнинские известия» яза.
Ярдәмгә янгын сүндерүчеләр килгән. Бу турыда Гадәттән тыш хәлләр министрлыгының Татарстан буенча идарәсенең матбугат хезмәте хәбәр итте.
Иртәнге икедә бу урынга янгын автоцистернасы һәм автобаскыч килә. Алар килгәндә кыз тәрәзә янында булмый инде.
Соңрак ачыкланганча, Чаллыда яшәүче кызны исерек егете фатирда бикләп куйган. Янгын сүндерүчеләр кызны автобаскыч ярдәмендә фатирдан алып чыккан, аны полициягә алып киткәннәр, диелә хәбәрдә.