Чаллыда яшәүче хатын бер ел эчендә өч бала тудырган
Бәхетле әни быел 20 гыйнварда игезәк кызлар, 20 декабрьдә тагын малай тапкан.
Узган якшәмбе, 20 декабрь көнне, төнге 2.45 сәгатьтә Чаллыда яшәүче хатын өченче баласын тапкан. Кама балалар медицина үзәге акушер-гинекологлары таптырган бу нарасый — әнисенең 2020 елда тудырган өченче баласы. Бу турыда «Челнинские известия» хәбәр итте.
Сабыйга Сәет дип исем кушканнар. Туганда аның авырлыгы 3590 грамм, буе 53 см.
Нәкъ унбер ай элек, 2020 елның 20 гыйнварында, бу хатын игезәк балалар тудырган булган. Аларга Сафия һәм Кәбирә дип исем кушканнар.
«Мондый очраклар була. Хатын-кызның беренче һәм икенче тапкыр бала табуы арасында 9 ай гына булган чаклар да очрый. Бу — сирәк күренеш түгел. Әлеге ситуациядә Чаллы хатынының күп балалы ана булуы түгел, бер календарь елы эчендә өч бала табуы кызыклы. Хәзер бала да, аның анасы да үзен яхшы хис итә», — дип сөйли Кама балалар медицина үзәгенең акушерлык һәм гинекология буенча җитәкче урынбасары Алексей Экстрин.