Чаллыда Яңа ел кичәсендә кызлар сугышкан

Чаллы шәһәрендәге кафеларның берсендә Яңа ел корпоративы күмәкләп сугыш белән тәмамланган. Бу турыда «Татарстан24» телеканалы хәбәр итте.

Сугышуда хатын-кызлар актив катнашкан, диелгән әлеге хәбәрдә.

Кафеда ял итеп утыручы ике төркем арасында җәнҗал чыккан. Алар йодрыкларын да эшкә җиккән. Берникадәр вакыттан соң бер төркемгә ярдәмгә тагын кешеләр килеп җитә. Бу — каршы якны нокаутка җибәрергә карар кылган хатын-кызлар була.

Бәйрәмне алып баручы сугышуны туктатмакчы булып карый. Ләкин аны ишетмиләр дә - сугышу дәвам итә.

Социаль челтәрләрдә таралган видео кадрларында алып баручы ханымның ялваруы ишетелә. «Кызлар, кызлар икәнлегегезне онытмагыз, туктагыз», — ди ул. «Бәйрәм итә белмәсәгез, бәйрәм итмәгез», — дип ачулана алып баручы.

Сугыш чукмарларын полиция хезмәткәрләре генә тыя алган.