Чаллыда утызлап машинаны бәрдергән ир-атны кулга алганнар
Ул Күп функцияле үзәктә эшләүче хатын-кыз белән талаша, аның мониторын вата һәм качып китмәкче була.
Чаллыда 2 мартта бер ир-ат хокук саклаучылардан качып китәргә маташканда, утызлап машинаны бәрдерә. Аны кулга алганнар. Хакимият вәкиленә карат көч куллану өчен җинаять эше дә ачканнар. Бу турыда Татарстан прокурорының өлкән ярдәмчесе Руслан Галиевка сылтама белән «Татар-информ» яза.
Тикшерү версиясе буенча, ир-ат исерек килеш Күп функцияле үзәккә килә. Биредә эшләүче хатын-кыз белән талаша, аның мониторын вата. Аннары ул машинасына утыра һәм урынга килеп җиткән полиция хезмәткәрләреннән качмакчы була. Шул чакта чит кеше машиналарын бәрдерә.
Бу ир-атны кулга алганнар. Тиздән аңа карата чикләү чарасы билгеләнәчәк, диелә хәбәрдә.
Чаллыда Күп фунцияле үзәктә бу ир-атның үзәк хезмәткәренең белән талашкан вакытын видеокамералар төшереп торган. Язмадан күренгәнчә, ир-ат хезмәткәрнең компьютерын идәнгә төртеп төшерә, дип «Татар-информ» хәбәр итте.