Чаллыда педиатрга чиратта хатын-кызлар сугышкан

Чаллыдагы №4 сырхауханәдә чират вакытында хатын-кызлар арасында сугыш чыккан. Төрткәләшүне чиратта торучыларның берсе, видеога яздырып, Вконтактега элгән. 

Конфликтның сәбәбе - бер хатынның башка участокка билгеләнгән баласын бу сырхауханәгә алып килүе. Ул чиратсыз гына үтәргә тели, әмма чиратта торучылар аны үткәрми. Бу ханым "сорарга гына" керәм дип әйтә, әмма сырхауханәләрдә чиратсыз керүнең мондый алымы бу юлы эшләми - хатынны барыбер үткәрмиләр. Шуннан соң ул бәреп кереп китә, әмма чиратта торучы бер хатын аны чыгарып ташлар өчен көрәшә башлый. "Керсен шунда, кертегез", - ди тынычлык яклылар. 

Хатыннар тарткалаша башлагач, ирләрдән катнашуны, сугышучыларны аеруны сорыйлар. Әмма алар да күзәтеп торуны гына мәгъкул күрә.

"Бер хатынның баласын ишеккә сыттылар, ул тоткага бәрелде. Минем балам курыкты - бөтенесе акырыша", - дип сөйләгән бер хатын социаль челтәрдә.

Социаль челтәрләрдә сугышкан хатын-кызларны гаепләгәннәр. "Хайваннар кебек тоталар балалар булган җирдә". "Үзләренең тәрбиясе шундый булган кешеләрдән шундый ук тәрбиясезләр үсә".