Чаллыда дистәдән артык кеше кар чистартырга комачаулаган «хуҗасыз» машинаны күчергән
Инстачылар машинага зыян килгән булырга мөмкин дип борчылган.
Кышын хәрәкәт итми, яртылаш кар астында калган машиналар һәр ишегалдында бар. Андый автомобильләр кар чистартырга комачаулый. Халык телендә аларны «умырзаялар» диләр.
Чаллыда машина куя торган урынны кардан чистарту өчен дистәләгән кеше бер автомобильне күмәк көч белән күчереп куйган. Бу хакта «Казан. Татарстан. Видеолар» аккаунтында хәбәр ителә.
«Машина яньчелгән, кырылган булырга мөмкин. Моның өчен инициатор җавап бирәчәк. Машина хуҗасы гариза язачак», — дип борчылган инстачылар.
«Туйдырды ул «умырзаялар». 21 гасыр. Ә аларның сигнализациясе дә, машина хуҗасының телефон номеры да юк. Хуҗа үлгәнме? Әллә аның акчасы күп, икенче машинасында йөриме? Әллә бензинга акчасы юкмы? Сат инде ул машинаңны кирәк булмагач, йә телефон номерыңны булса да калдыр. Сез ишегалдын чистартырга, йорт түбәсеннән кар төшерергә комачаулыйсыз», — дип ачынып язучыны калганнар да хуплап алган.