Чаллыда бер машинага йомыркалар атып буяп бетергәннәр
Хуҗа кеше төнлә генә кайткач, машинасын ишегалдында калдырып торган булган.
Чаллыдагы бер ишегалдында парковкада тора торган машинага йомыркалар атып, пычратып бетергәннәр. Бу турыда «Челнинские известия» яза.
Машина хуҗасы сүзләренчә, ул төнлә соң гына кайтып туктаган һәм иртән җиденче яртыда машинасын алып та китәргә җыенган. Ләкин иртән ишегалдына чыккач, машинаның йомырка белән пычранып бетүен күреп алган. Хәзер ул машинасына «йомырка белән һөҗүм итүчене» табарга тели. Аның турында белешмә өчен бүләк бирергә вәгъдә итә. Хуҗа кеше бу турыда социаль челтәрләрдә яза.
Ул низаглашып йөрергә җыенмый, «үчле кешенең күзенә карарга гына тели».
Социаль челтәр кулланучылар исә аны машинасын дөрес куймаган өчен тәнкыйтьли. «Машиналарын теләсә кайда ташлап китәләр, ә иртән башкалар эшкә соңга кала», — дип язалар.
