Чаллыда 17 яшьлек кызны берничә үсмер егет көчләгән дип шикләнәләр
Узган ялларда үсмерләр бер фатирда очрашкан.
Чаллыда өч үсмер егет 17 яшьлек кызны көчләгән дип шикләнәләр. Бу турыда «Татар-информ» агентлыгына үз чыганагы хәбәр итте.
Агентлык чыганагы сүзләренчә, җинаять узган ялларда Яңа шәһәрдә була. Биш егет һәм кыздан торган төркем бер фатирда очрашкан. 15-16 яшьлек өч малай кызны интим мөнәсәбәткә мәҗбүр иткән.
Хәзерге вакытта җинаятьтә шикләнелүчеләр тоткарланган. «Көчләү» маддәсе буенча җинаять эше ачылган, диелә бу хәбәрдә.
«Челнинские известия» хәбәр иткәнчә, кызны көчләгәч, егетләр качып киткән. Аларны тоткарлаганнар. Үсмерләрнең шәһәрнең ике мәктәбендә тугызынчы сыйныфта укучы малайлар булуы ачыкланган.
