Чаллы кешесе музыка кычкыртканга кисәтү ясаган күршеләренә пычак кадаган
Ир-ат үз әтисен үтергән өчен төрмәдә утырып чыккан.
Чаллыда яшәүче 32 яшьлек ир-ат тулай торактагы бүлмәсендә аракы эчеп, кычкыртып музыка тыңлап утырган. Күршедә яшәүче ир-ат белән хатын-кыз музыка тавышына зарланып кисәтү ясаган. Низаг сугышка әверелгән. 32 яшьлек ир-ат пычак алган һәм күршеләрнең икесенең дә күкрәгенә кадаган. Бу турыда «Татар-информ» агентлыгы тикшерүгә сылтама белән хәбәр итте.
Урынга полиция хезмәткәрләре килә, алар җәнҗал чыгарган ир-атны тоткарлый. Ир-ат исә полициягә дә сүгенеп кычкыра.
Ир-атка карата «үтерергә маташу», «хакимият вәкилен кимсетү» маддәләре буенча җинаять эше ачылган. Бу кеше әле былтыр гына төрмәдән чыгуы ачыкланган. Ул үз әтисен үтергән булган.