Чәкчәк (рецепт)
Лаеш районы Сиңгел авылында яшәүче Альмира Миңнуллинадан чәкчәк рецептын тәкъдим итәбез.
Камыр өчен: 5 йомырка һәм тагын 5 йомырканың сарысы, 1 бал калагы көпшәкләндергеч, чама белән он.
Йомыркаларны бергә салып миксер белән 10-15 минут күпертергә, масса 2-3 тапкыр арта, көпшәкләндергеч салырга, онны иләп әз-әзләп салып йомшак камыр басарга. Аннары камырны 15-20 минут ял иттерергә. Соңыннан җәем җәяргә, тасмалар кисеп вак-вак төшләргә бүләргә.
Төшләрне иләккә салып онын иләргә, уртача кызган үсемлек маенда алтынсу төскә кергәнче болгата-болгата пешерергә. Икенче партияне салганчы майны бераз суытырга, юкса, төшләр ярылып китәргә мөмкин.
Сироп өчен: 0,5 кг шикәр комын 350 грамм бал белән кайнатырга. Сиропның өлгергәнлеген салкын суга салып белергә, әзер булса шарчыкланырга тиеш, ә җәелеп китсә, әзер түгел дигән сүз.
Төшләргә сироп салып болгатырга, өеп куярга һәм матур итеп бизәргә мөмкин.
Чәйләрегез тәмле булсын!
